★ میر عشق اور مرثیۂ زعفرؒ جن ★

جناب نیر مسعود صاحب نے اپنے طویل مضمون ’زعفر جن‘ (بحوالہ ’منتخب مضامین‘ از نیر مسعود، آج کی کتابیں، کراچی ، ۲۰۰۹) میں ایک واقعہ پوری تفصیل کے ساتھ بیان کیا ہے اور مثالوں کے ذریعے اس کے ساتھ جڑی نہایت دلچسپ روایتِ مرثیہ کے خدوخال بیان کئے ہیں۔ انہوں نے میرانیس، مرزا دبیر اور میر مونس کے مرثیوں کا سرسری تذکرہ کرتے ہوئے میر حسین میرزا عشق کے مرثیے ’عروج اے مرے پروردگار دے مجھ کو‘ کو زعفر جن کے موضوع پر بہترین شاہکار قرار دیا ہے۔ ان کے مطابق میرزا عشق کے مرثیے کی منفرد ترین خاصیت اس کے راویوں کا پیچیدہ نظام ہے۔مرثیے کی استخواں بندی کل آٹھ راویوں کی مدد سے ہوئی ہے، جن میں میرزا عشق پہلے راوی ہیں جو روایتی مناجات اور کربلا کے منظر سے آغاز کرتے ہیں۔ نقشہ بندی اور باادب مناجات کے بعد ایک دوسرے راوی جو کوئی عالم ہیں ایک کتب خانے میں اس کتاب کے ملنے کا ذکر کرتے ہیں جس میں زعفر جن کا قصہ نقل ہوا ہے۔ اس کتاب کا مصنف تیسرا راوی ہے جس کی کشتی سمندر کے سفر کے دوران تباہ ہو جاتی ہے اور وہ بے ہوش، ایک تختے کے سہارے موجوں کے رحم و کرم پر رہ جاتا ہے۔ آنکھ کھلتی ہے تو خود کو ایک جزیرے پر پاتا ہے جہاں اسے ایک عجیب و غریب شخص نظر آتا ہے جو روتے روتے زمین پر انگلی سے ’’حسین‘ لکھ رہا ہوتا ہے۔

کوئی درخت نہ آدم نہ جانور دیکھا

عجیب عالمِ عبرت ادھر ادھر دیکھا

بڑھا جب آگے عجب شخص پرخطر دیکھا

خموش بیٹھے ہوئے اس کو خاک پر دیکھا

رواں تھے اشک برابر زمین پر اس کے

پڑے تھے بال سرا سر زمین پر اس کے

اس تحریر کو نیر مسعود صاحب کے مضمون کی ایک مختصر ترین تلخیص کہا جا سکتا ہے لیکن پورا مضمون پڑھنے کے لائق ہے۔ وہ ذکر کرتے ہیں کہ میر عشق نے اس مرثیے پر کیسی کیسی داد وصول کی۔ جب عشق نے یہ مرثیہ پڑھا انیس و دبیر دونوں اس مجلس میں موجود تھے اور میر انیس نے انہیں ہدایت کی کہ اس کو اپنی قبر میں رکھوا لینا کہ تمہاری نجات کے واسطے کافی ہو گا۔

Special Thanks to; Zeeshan Zaidi for this short Introduction & Syed Ashtar Abbas Naqvi for providing 27 Marasi from Volume II of Mirza Ishq Marsiyas

MARASI E MEERZA ISHQ

eMarsiya – Spreading Marsiyas Worldwide